аумақтық жарылыс жасайтын қару-жарақтар

қарсыластың адам күштерін және қорғаныс ғимараттарын қиратуға арналған қару түрлері. Құрамына жанғыш газдар (пропан, пропадиен, металацетилен), сондай-ақ әр түрлі сұйық жанармай түрлерінің буы кіретін жарылғышпен жарақталады. Бомба корпусы бұзылған кезде ауада диаметрі 15 м, биіктігі 2,5 м тез арада жарылатын (секундтың оннан бір бөлігінен бірнеше секундқа дейінгі аралықта) қою аэрозоль бұлты пайда болды. Бұлттың бүкіл аумағында 20—30 кг/см² артық қысымды қуатты жарылыс болады. А.ж.ж.қ-ж-тың адам күші мен қорғаныс ғимараттарын зақымдау әсері жарықшақты және фугасты бомбаларға қарағанда ондаған есе күшті. Газ қоспаларының бұлты әр түрлі инженерлік ғимараттарға еніп, оларды іштен жарады. Жарылыс болған жерде жанған заттармен уланған, оттегі азайған атмосфера қосымша зақымдау факторы болып табылады. А.ж.ж.қ-ж-тың зақымдаушы факторларынан қорғану әдістері – паналау ғимараттары, сондай-ақ жарылыс болған жерден қашық орналасқан жыра-сайлар мен шұңқырлар.